Nutaarsiassat

Inuiaqatigiinnut annertuumik sunniuteqaqataavugut

Halibut Greenland ApS ukioq 2009 piginneqatigiiffik aalisartunik aalisartuunngitsunillu ataasiakkaanik pilersinneqarpoq, nuannaarutigaarpullu suli maannamut suliffeqarfiup annerpaartaa aalisartunik pigineqarmat. 2010 august-imi Ilulissani tunisassiorfik nutaaq ammarneqarpoq. Tunisassiorfiliornermullu tunngaviulluinnartut ilagivaat aalisartup aalisakkanik tunisinermini akigitinneqartut piginnittunit allannguiffigerusunneqarneri. Suliffeqarfiup pilersinneqarnera isumaqarpoq pisortaqarfiit suliffeqarfiutaanut unammillerniarnerusoq. Pisortaqarfiillu unammillerniarnerat annertuumik iluatsittutut taaneqarsinnaavoq. Unammilleqatigiinnerullu aqqani aalisakkanik tulaasinermi akit pitsanngoriartinneqarsimallutik.

Assersuutingalugu 2005-2010-llu akornanni agguaqatigiisillugu 4,3%-iinnarmik ukiumut akinik qaffaasoqartarsimavoq. Halibut Greenland ApS-illi tunisassiorfeqalernerata kingorna 2011-2017-mut ukiumut agguaqasigiisillugu 13,0 %-imik akit qaffanneqartarsimallutik. Taamaalilluni aalisartunut atungassarititaasut annertuumik pitsanngoriarsimaneri oqaatigineqarsinnaalluni.

Aalisartunuinnaq pitsanngoriaat tunnganngilaq, tassami ilaqutariinnut aalisartukkormiunut inuuniarnermi aningaasaqarnikkut sunniutaasoq pitsaasoq annertuvoq. Minnerunngitsumillu Kalaallit Nunaani inuiaqatigiinnut aamma sunniuteqarpoq, pingaartumik Ilulissat illoqarfianut ukiumut aalisakkanik aalisartumit pisiarineqartartut aningaasanngorlugit kr. 56 mill. Kr.-inik 2009-imut sanilliullugu qaffassimallutik. Taamaasilluni 2010-miit ullumikkumut aalisakkamut akigitinneqartartup kingunerivaa pilersitsinerup kingorna Ilulissani aningaasat 471,6 mio. Kr.-nit kaaviaartinneqarnerulersimanerat.

Suliffeqarfittut ingerlatsineq oqittuinnaanngilaq, tassami pinngortitap atungassarititai apeqqutaalluinnartarput, taassumalu saniatigut pisortaqarfiit suliffeqarfiutaanit annertuumik unammilleqatigiinneq ingerlanneqarluni. Taamaakkaluartoq Halibut Greenland ApS suli aalisartunut atungassarititat pitsanngorsarniarlugit suliniutinik assigiinngitsunik ingerlataqarpoq, suliallu naammassiniarlugit ilungersortoqarpoq siulersuisut, piginnittut sulisullu akornanni.

Halibut Greenland ApS suli pissutsit atungassarititat pitsanngorsaqqikkumallugit suliniuteqarpoq, pisariaqartipparpullu aalisartunik sulisunillu pitsaasunik tapersersorneqarnissarput.

Paasissutissanik aallerfik: Grønlands statistik

Ukiuni qulinngortorsiorneq

Halibut Greenland ApS suliffeqarfiup pilersinneqarneraniik majimi 2018 ukiuni qulinngortorsiorpoq.

Tamannalu malunnartinniarlugu kikkunnut tamanut ammasumik katersortarfimmi kaffillertoqarpoq peqataaffigilluarneqaqisumik.

Kaffillernerup saniatigut Halibut Greenland ApS-imut tunngasunik paasissutissanik assigiinngitsunik saqqumiisoqarpoq, ballon-inik refleksinillu tunioraasoqarluni.

Nalliuttorsiornermut atatillugu immikkut piginneqataasut akornanni Otto “Aqqalu” Mathiesen nersornaaserneqarpoq, kajumissaatillu pingasut ukununnga tunniunneqarlutik: Kristian Olsen, Finn Dalager aamma Jess Johansen.

Immikkut aamma sulisut akornanni Gerth Ottosen nersornaaserneqarpoq, Mathias Mathiassen-lu kajumissaaserneqarluni.

Qujavugut suliffeqarfiup pilersinniarneqarneraniik maannamut suleqataasimasunut tamanut, minnerunngitsumillu aalisartunut tunisassiorfimmut pilersuisuusunut.